Denes je Ivanje. Moj pajdaš Ivek sigurno me čaka. A kak me i nej čakal kad zna da bum došel. Nekak mi je ove dneve ne dobro, se si premišljavam za moj ljubavni život. Japica Gusti bi to rešili na tri – štiri. Nega bilo pri njima zajebancije. Daš – nedaš i to je to.
Mamicu su da gord k zidu pritisnuli, ali veliju japica dok su njim mamica rekli… smerdiš po ljuku, mam njim je opal. Od serditosti su si z kljinčenice zeli škerljaka i dišli pit. Kelnerici Ružici je ne bilo treba dva put reči. Gemišt je bil zdeni kaj je po grkljanu žlaburil kak dravski rukavec. Naslonjeni na derveni šank, dočakali su fajrunta, a gosak Gusti ji je čakal v škednju na prikolici.
Več pot dok si ga Ivek tak naglo nagne, zmislim se japice, ali to je ne to. Prekzutra dojdu veličasni z križecom i to je ono kaj me moči. Nesem pred Božić odišel na spoved, jer me bilo strah elj je ne Veronika bila prije mene na spovedi i se povedala. Nemam vupača oditi do svoje zaručnice jer me strah dal je ne dete naprajil kakof frater. Unda si pak mislim, nemogoče kaj to bila istina, Veronika je moja. Znam da se slekla z halje i da za dete pripravlja haljinjiče. Denes bi moral k Iveku, imendan je imendan, a njemu je Ivanje svetek vekši nek bilo koji drugi. Nešto koči po vrati! Za pet ran, što je pak ve? Soseda Jana, garant z litrakom. I oni se zgleda ravnaju. Mam idem otkljenoti.
Vražja žarulja, pak je vuni zgorela. Garancija ji je pet i pol dni, a negda, dok sem bil mali se v grli zahrđavela kaj je moral dojti električar ju otkverdati i deti drugu.
V kmicu ne vidim nikoga, Morti su kakvi cigančeki došli čestitat i odišli. Eee, pred tridesti let i več su tu naši Cigani čehalji kak sam vrag. Znam da je Cigan Vanja vu violinu vužgal onu japičinu Kraj jezera, jedna kuća mala… a japica, moj japica Gusti su gosaka Gustija obrnuli oko sebe kaj mu je perje letalo okolo, čak njim se jempot pero nateplo v joko kaj su njim mamica sirutkom štiri dni natečenoga obraza hladili. Jebiga, čovek njim je dal fanj penez i imel je pravo svoju pesmu pet put zaredom posljušati. Još se naljukavlem čez steklo i nikoga nega. Dvorišče je kmično kak vuni pesmi…Nega sonca nit meseca, pretemna je nočka…
Isusek dragi, Veronika je na dvorišču. Veronika! Kaj oče, za Boga miloga! Aha, ja sem jotec našega deteta. Morti je to. Mam ji otkljenem.
– Dober večer, Veronika. Oprosti mi kaj sem te mam ne videl. Znaš da kojekakvi lopovi voluhare okolo po pusti dvorišči, pak nigdar ne znaš. Ljupi te po tikvi i gotovo. Prosim, hodi nuter, hodi…
– Dober večer. Ne bih ulazila, dragi moj. Ako ti nisi imao potrebu doći do mene… čemu onda sve to. Samo sam te došla pitati. Priznaješ li ti ovo dijete za naše ili neka nosi naše prezime. Mislila sam da ćeš se ponijeti muški…
– Veronika… mila… draga… naj tak, kajpak da bom priznal svoje dete, pak kaj si zabila kak smo se radi meli… moje srce je navek bilo samo tvoje… Zakaj si mi ne rekla da si noseča?
– To se danas kaže trudna, znači sada ti kažem. Ja nosim naše dijete, tvoje i moje, muško je.
– Muško? Znači Gusti? Juhuuu!
– Ne zavijaj. Reci mi iskreno o sebi i susjedi Jani. Prijatelj Ivek mi je, onako pomalo pod parom rekao da ste vas dvoje ljubavnici. I ono što sam vidjela prošli put… ne želim da moje dijete ima takvoga oca. Što je istina?Ja dijete mogu odgajati sama. Mogu se zaposliti, a imam i nešto ušteđevine…
– Veronika, moje dete, naše dete kaj ti zdigala sama? Ne, ne i ne. Laže Ivek, laže. Ja kak sem s tebom, nesem pogledal drugu ženu. Soseda Jana su naša pajdašica. Ispalo je bedasto kaj smo fulali krevete, događa se…
Od mladosti, ti si moja, moja i samo moja. Dojdi kaj denem roko na dete.
– Ne. Došla sam samo upitati te, hoćemo li se vjenčati poslije Nove Godine. Da se mali ne rodi kao vanbračno dijete.
– Veronika, voliš li ti mene?
– Volim te, jako te volim. Želim da dođeš živjeti u našu kuću. Velika je. Imati ćemo dovoljno prostora za sve što želimo.
– Veronika… – noge su mi se odsekle… Veronika, a ova moja hižica?
– Reci, dragi, želiš je zadržati?
– Moram, japica Gusti…
– Aj šuti, idemo unutra. Je li dovoljno toplo? Želim da me zagrliš!
– Navek i zanavek, draga moja Veronika.
Dok sem ju prijel v naručje, te čas sem se preselil na nebo. Bila je fanj okrogla. Moje dete! Stisnula se k meni i mali Gustek me vritnol. Ma pravi japica Gusti bo. Garant. Samo kaj ovi dnevi prejdu, te svetki, to je kak da te saki den streljaju. Sigdi kolači i pijača i dok se smrkne več si hurmak.
Je, moram još denes do Iveka. Ovo Ivanje bo zapamtil. Veroniki je lagal. Noge mu bom strgal i nabo mu palo na pamet več lampu otpirati bez veze. Soseda Jana razmeju, a škorjanca bom imel na vuzdi. Sigurno je sigurno. Ja sigurno nečem spati z gosakom na prikolici kak moj japica. Bog njim dušu zveliči.
